भिमाद सञ्चार
तनहुँ २०८० असार २८ अन्जान परियार, घिरिङ।
तनहुँको घिरिङ गाउँपालिकामा धार्मिक र पर्यटकीय स्थलको प्रबर्द्धनमा जोड दिँदै वर, पिपल र स्वामी रोपण अभियान भैरहेको छ। वडा नं १ अन्तर्गत दिब्यधाम पुट्टार क्षेत्रको पबित्र देवत्व स्थल कालीगण्डकी सतिघाट उत्तरबाहिनी क्षेत्रमा १ सय ८ का दरले बर, पिपल र स्वामी रोपण कार्य सम्पन्न भएको छ। हरिशयनी एकादशिको अबसरमा १ सय ८ पिपल रोपेर सुरुवात गरिएको कार्यक्रमलाई पुर्णता दिँदै बिहिबार साउन कृष्ण एकादशिको दिन १ सय ८ वर र १ सय ८ स्वामीका बृक्ष रोपिएको थियो।
धार्मिक महत्वका दृस्ठिकोणले ब्रहम्मा,बिष्णु,महेश्वरको रुपमा लिईने वर, पिपल , स्वामी लगाउँदा हिन्दु संस्कार र संस्कृतिको संरक्षण एबम सम्बर्द्धन हुने परिकल्पना संगै यस क्षेत्रको वातावरणीय एबम पर्यावरणीय अन्वयमा टेवा पुग्ने उदेश्यले सो कार्यक्रम गरिएको हो। पर्यटकिय तथा धार्मिक दृष्टिकोणले यहाँ परिलक्षित योजनाहरुलाई निर्धारित भबिष्यको निश्चित समयमा सम्पन्न गर्न सके सभ्यता र आर्थिक समृद्धिका दृष्टिकोणले यस क्षेत्रको मात्र नभई समग्र राष्ट्रलाई सहयोग पुग्ने देखिन्छ।
कालिगण्डकी तिर्थ यात्रा नेपालको आयोजनामा संचालन गरिएको वृक्षरोपण कार्यक्रममा वर पिपल स्वामी तथा वातावरण संरक्षण समितिका अध्यक्ष होमनाथ सिग्देलको अध्यक्षतामा भएको उक्त कार्यक्रममा प्रमुख अतिथी घिरीङ गाउँपालिका अध्यक्ष होम वहादुर थापा रहनु भएको थियो। कार्यक्रममा बोल्दै अध्यक्ष थापाले नेपालको महत्वपूर्ण धार्मिक क्षेत्र पशुपतिनाथ, लुम्बिनी, जनकपुर, देवघाट धाम जस्ता धार्मिक स्थलहरुमा राष्ट्रिय मात्र नभइ अन्तर्राष्ट्रिय लगानी बढेको हुँदा घिरिङको पनि सतिघाट धामले निकै महत्व र ठूलो लक्ष्य राखेको बताउनु भएको थियो।
कार्यक्रममा बिशिस्ट अतिथीको रुपमा रहनु भएका घिरिङ गाउँपालिकाका प्रमुख प्रशासकीय अधिकृत बिष्णु प्रसाद पोखरेलले वर, पिपल र स्वामी रोपेर स्वच्छ पर्यावरणीय धार्मिक स्थलको रुपमा बिकास गर्दै घिरिङकै प्रमुख तिर्थस्थल बनाउने उदेशय गाउँपालिकाले राखेको बताउनु भएको थियो।
कार्यक्रममा घिरिङ गाउँपालिका उपाध्यक्ष राधा देवि अधिकारी, कालिगण्डकी तिर्थ यात्रा नेपालका अध्यक्ष एबम यस कार्यक्रमका अभियान्ता नवीन पाण्डे, वडा नं १ का अध्यक्ष रवि चन्द्र घोरासिनी, वडा नं १ का निबर्तमान अध्यक्ष गंगाराम कुमाल, कृष्ण माध्यमीक बिधालयका प्रधानाध्यापक ध्रुवराज सिग्देल, राधा कृष्ण माध्यमिक बिधालय निस्तिका प्रधानाध्यापक भेषराज अधिकारी लगायतले घिरिङको प्रमुख धार्मिक स्थलको रुपमा पहिचान गराई धार्मिक आस्थाको केन्द्र बनाउने लक्ष्यमा सबैको हातेमालो हुन आवस्यक रहेको बताउनु भएको थियो।
गाउँपालिकाको समन्वय र स्थानीय नागरिकहरुको सकृयतामा झण्डै ५ सय जनाको उपस्थितिमा गरिएको उक्त कार्यक्रम निकै उदाहरणीय मानिएको छ। कृतन भजनका साथ रमाइलो वातावरणमा उक्त वृक्षरोपण कार्यक्रम भएको थियो। साथमा पोखरा सुबिसु टिभीका पत्रकारहरु बाट उडाइएको ड्रोनले पनि ठूलो आकर्षणता थपिएको थियो। सो कार्यक्रम संस्थाका सचिब खिमकर्ण ढकालले गर्नु भएको थियो भने निस्ती गाउँपालिका वडा नं १ का पुर्व वडा अध्यक्ष पुर्ण बहादुर खांँडले स्वागत मन्तब्य राख्नु भएको थियो।
